O PSdeG esíxelle á Xunta solucións á falta de prazas e frecuencias do transporte metropolitano en Ferrolterra

• O deputado autonómico Aitor Bouza levará a cuestión ao Parlamento de Galicia, xa que “é culpa única e exclusivamente da mala xestión das políticas de transporte da Xunta”

O PSdeG-PSOE esísexelle á Xunta de Galicia solucións ás problemáticas do transporte metropolitano en Ferrolterra, que inclúen a ausencia de frecuencias suficientes e que a xente non poida subir aos buses por falla de prazas.

Por unha banda, o secretario xeral provincial Bernardo Fernández Piñeiro sinalou que “son moitos os problemas que detectamos xa dende hai anos, dende que se sacou ao novo contrato, que foi un auténtico desastre que está a afectar a cidadáns de moitísimos dos Concellos”.

O tamén alcalde de Pontedeume denunciou que dito contrato “prima a conexión por autoestrada, deixando incomunicadas a moitas zonas de municipios da contorna”. “Por exemplo, en Cabanas, na zona de Laraxe só teñen autobús a primeira hora da mañá e a última hora da tarde”, lamenta.

“Hai unha residencia da terceira idade que acolle a moitas persoas da nosa bisbarra, e se non teñen un vehículo pois teñen que pagar un taxi, co sobrecusto que iso supón”, indica tamén o socialista.

Ademais, sinala Fernández Piñeiro, “son moitas as persoas que quedan tiradas nas paradas porque non hai prazas suficientes nos autobuses. “Levamos varios anos con esta situación sen que se adopte ningún tipo de medida”, engade.

“É verdade que tivemos xa varias reunións na delegación territorial da Xunta en Ferrol para tratar este tema, pero non son máis que reunións, nas que trasladamos unhas propostas e nas que se nos di que están traballando co tema, pero todo segue igual”, critica.

“Esixímoslle ao presidente da Xunta que adopte medidas xa, de forma inmediata, para solventar esta situación e rematar cunha problemática como está afectando a milleiros de veciños e veciñas da comarca de ferroterra”, conclúe o secretario xeral provincial.

Pola súa banda, o deputado no Parlamento galego Aitor Bouza denunciou que o novo modelo que o PP acaba de implantar en Galicia, combinando o transporte escolar co transporte ordinario, provoca que o alumnado chegue ao centro “moitísimo antes de que comecen as clases ou que teñan que esperar para poder, unha vez finalizadas as clases volver ás súas casas”.

“Imos a levar ao Parlamento de Galicia esta situación, que é culpa única e exclusivamente da mala xestión das políticas de transporte da Xunta de Galicia”, avanzou o parlamentario socialista.

“Algo que non pode volver ocorrer é que teñamos un novo inicio de curso escolar no que cada vez máis familias teñan que buscar outros métodos para levar os seus fillos e as súas fillas aos centros educativos”, subliña Bouza.

Finalmente, o voceiro socialista local Ángel Mato lamentou que o alcalde Rey Varela renunciase a reclamarlle á propia Xunta de Galicia un traballo que tiña que ter feito, non hai máis que ver a situación na que se atopa a propia estación de autobuses de Ferrol, que debería de ser o referente comarcal”.

“Éncheselle a boca de falar dos proxectos do tren, que evidentemente é unha reclamación que nós non imos deixar pasar tampouco, pero esquece falar da competencia que ten para reivindicarlle á Xunta de Galicia, algo que é imprescindible”, critica Mato. “A Xunta de Galicia non pode esquecer como está esquecendo Ferrol, e o que é máis grave, o alcalde de Ferrol ten que exercer as súas competencias para reivindicar e esixir que con carácter urxente se resolva un problema que leva así moito tempo”, engade.