Aitor Bouza lamenta que os orzamentos de 2027 anunciados para Ferrolterra e Ortegal “nada van cambiar a vida da xente”

• O deputado socialista Aitor Bouza denunciou a ausencia de inclusión de melloras en materia de sanidade, educación ou infraestruturas nos orzamentos anunciados pola Xunta para as comarcas de Ferrolterra e Ortegal

O deputado socialista no Parlamento galego Aitor Bouza lamentou que os novos orzamentos que anunciou a Xunta de Galicia “por desgracia, nada van cambiar a vida da xente aquí en Galicia”. Bouza asegurou que “as preocupacións importantes nas comarcas de Ferrolterra e Ortegal, como son a sanidade e a educación públicas de calidade, e as infraestruturas que as sosteñen, non están cubertas nestes orzamentos”.

Segundo o parlamentario, estas preocupacións en materia de política social, vivenda, educación ou sanidade, remóntanse a anos atrás pero non se chegan a executar. “Vemos como todas esas promesas de centros educativos que se levan facendo durante anos non se plasman a día de hoxe, e polo tanto non deixan de ser meras promesas que volven estar incumpridas”, declarou Bouza.

O socialista anunciou que dende o PSdeG-PSOE, “ante este castigo outra vez máis da Xunta de Rueda ás comarcas de Ferrolterra e Ortegal”, presentarán emendas ós orzamentos para que se poidan corrixir estas deficiencias. “Nós traballaremos para que a voz da cidadanía e sobre todo os dereitos das persoas se garantan nestes orzamentos”, asegurou Bouza.