O PSdeG denuncia en Carballo a falta de profesionais nos centros de saúde de toda a comarca

-A deputada no Parlamento galego Patricia Iglesias fixo un chamado a participar na manifestación pola Sanidade Pública deste domingo en Santiago

O PSdeG-PSOE denunciou, dende o Centro de Saúde de Carballo, a falta de profesionais nos centros de saúde e outras deficiencias na sanidade pública de toda a comarca.

A deputada socialista no Parlamento galego Patricia Iglesias Rey lamentou a “situación de shock” que vive a sanidade na comarca e en Galicia, en especial coa falta de especialistas. Por exemplo, cita a parlamentaria, “cuantificábanse pola Asociación de Pediatría en Galicia que máis de 40.000 nenos non teñen dereito a 1 pediatra no seu centro de saúde”.

“Tamén saía onte un informe do Consello de Contas onde se dicía que aumentou o 18% a derivación á sanidade privada, é dicir, cartos hai”, sinala Iglesias Rey.

“As socialistas de Galicia avogamos por unha sanidade pública para todos e todas as galegas e, sobre todo, que sexa accesible e de calidade con profesionais en todos os centros de saúde”, afirmou.

Para a socialista “debería preguntarse o goberno de Rueda realmente por que non se cubren as prazas MIR en Galicia”, xa que a precariedade “é un feito para todo o persoal do Sergas desde os facultativos ata os celadores”.

Fixo un chamado a que “se sume todo o mundo á manifestación” pola Sanidade Pública convocada para este domingo ás 11:30 na Alameda de Santiago de Compostela, para defender un sistema “de calidade e, sobre todo, para todos e todas as galegas”.

Pola súa banda, a voceira socialista no Concello da Laracha, Inés Ramos López, subliñou tamén “a falta de profesionais, tanto médicos como especialistas, en toda a comarca”.

Enumerou tamén “a necesidade dunha ambulancia medicalizada, a falta de especialistas como por exemplo o pediatra en Zas ou, por exemplo, a tardanza para poder ter unha cita coa matrona no caso da Laracha, que de 15 dias”. Reclamou tamén “un acondicionamento do aparcamento para o helicóptero de urxencias” en Carballo, e, en xeral, “que todos os cidadáns podemos ter acceso” á Sanidade Pública.