Os técnicos do Concello de Pontevedra desmontan a versión do Goberno Municipal sobre os bolardos da rúa Peregrina: non consta ningún informe técnico da Policía Local que avale a súa instalación

• A Oficina Técnica de Mantemento, Residuos e Limpeza e Transportes admite que «ditos elementos se dispuxeron a través dunha actuación ordinaria de mantemento viario», e contradí as declaracións nas que o Goberno do BNG defendía que «en cuestións de mobilidade, seguía as pautas dos técnicos, dos informes da Policía Local»
• «Pois ben -sinala o portavoz do PSOE, Iván Puentes- resulta que, tal e como sospeitabamos, a Oficina Técnica recoñece que, efectivamente, non lle consta ningún informe específico ao respecto»
• Puentes lembra que, pola contra, «a Policía Nacional si elaborou e entregou a Subdelegación do Goberno e Concello un informe que pon de manifesto os perigos que estes obstáculos supoñen para o desempeño do labor das Forzas e Corpos de Seguridade e os servizos de emerxencias, impedindo o rápido acceso dos vehículos policiais en actuacións urxentes»

Pontevedra, 28 de agosto de 2024.- En plena controversia sobre a instalación dos bolardos no contorno da Fonte dos Nenos (na rúa Peregrina) por parte do Concello, cando Policía Nacional e Subdelegación do Goberno alertaban dos perigos que estes obstáculos supoñen para o desempeño das Forzas e Corpos de Seguridade e outros servizos de emerxencias, o Goberno Local, a través do concelleiro nacionalista César Mosquera, aseguraba que «en cuestións de mobilidade, seguía as pautas e informes dos técnicos, da nosa Policía Local». Unha aseveración que levou ao portavoz municipal do PSOE, Iván Puentes, a informarse en detalle sobre os hipotéticos argumentos técnicos que sustentaban a decisión e a solicitarlle á Concellería de Seguridade Cidadá acceso ao suposto informe.

Tras varios meses de agarda, o socialista vén de recibir unha resposta da Oficina Técnica de Mantemento, Residuos e Limpeza e Transportes que desmonta totalmente este intento de disfrazar de decisión técnica o que foi unha determinación política non consensuada coa Policía Nacional e os servizos de emerxencias. Segundo explica Iván Puentes, a contestación do departamento do Concello «recoñece que non existe ningún informe técnico municipal que avale a necesidade e conveniencia da instalación dos bolardos na glorieta de Compostela».

«Pois ben -sinala Puentes-, resulta que, tal e como sospeitabamos, a Oficina Técnica recoñece que, efectivamente, non lle consta ningún informe específico ao respecto, e que ditos elementos de balizamento se dispuxeron a través dunha actuación ordinaria de mantemento viario, en base a problemas detectados nesta zona peonil polo exceso de circulación rodada». A propia Concellería de Seguridade Cidadá reiteroulle ao portavoz do PSOE (noutra contestación á súa solicitude) a mesma información facilitada pola Oficina, matizando que este tipo de «actuacións ordinarias de mantemento e conservación do viario municipal determínanse mediante reunións administrativas de coordinación entre os departamentos implicados coa concellaría responsable».

Iván Puentes lembra que, «fronte ao informe apócrifo que o BNG nos quixo coar, pola contra, a Policía Nacional si elaborou e entregou á Subdelegación do Goberno e ao Concello de Pontevedra un informe técnico que pon de manifesto os riscos que estes bolardos supoñen para o labor das Forzas de Seguridade e dos de emerxencias». «Informe, este último, que revelou tamén que a instalación destes bolardos non fora consensuada e que levou á propia compañeira do señor Mosquera, a concelleira de Seguridade Cidadá, Eva Villaverde, a ter que desdicirse neste sentido», apunta o líder socialista.

En opinión de Puentes, «resulta pouco serio que, nun asunto tan relevante como este, no que estamos a falar de intervencións policiais nas que o tempo de reacción resulta crucial, como nun incendio ou nun caso de violencia machista, o Goberno Local estea a despregar este despropósito de incongruencias e medias verdades». «Non só carecen dun informe técnico que avalase ou recomendase a colocación destes bolardos -matiza-, senón que nin sequera se abren a consensuar coa Policía Nacional outro tipo de solucións que permitan unha circulación áxil dos vehículos de emerxencias, como a de instalar uns bolardos retráctiles automáticos, que baixen ao detectar as matrículas dos coches autorizados, ou máis sinxelamente, facilitándolles unha simple chave para que os poidan retirar con rapidez».