Máis de 5 millóns de euros con selo do PSOE para impulsar proxectos clave da cuarta e maior modificación de crédito deste mandato

• Entre as actuacións que os socialistas acordaron co BNG para aprobar esta modificación inclúense partidas para a reforma integral da Praza de Pasarón; a apertura dos xardíns da Uned en Monte Porreiro; a reposición de herba artificial nos campos de fútbol do Complexo Manolo Barreiro; a adquisición e instalación de novos videomarcadores e sistema de megafonía no Estadio de Pasarón; a creación dun novo parque entre Ernesto Caballero e as vías do tren; a limpeza e conservación do conxunto artístico da Illa das Esculturas; a renaturalización do Lérez entre a Ponte dos Tirantes e a AP-9; ou a restauración ecolóxica do Gafos entre Rosalía de Castro e As Corbaceiras
• O portavoz do PSOE, Iván Puentes, asegura que «nestes tempos, nos que está de moda a política da confrontación, a trincheira e a polarización, nós cremos na política do diálogo o entendemento». «Isto é o que quere a veciñanza dunha cidade tranquila como Pontevedra», sostén
• Puentes pídelle ao candidato do PP, Rafa Domínguez, que «en lugar de travestirse de Isabel Díaz Ayuso e facernos discursos sobre política madrileña neste Concello, colla unha a unha as medidas que se inclúen nesta modificación de crédito e diga unha soa na que non está de acordo»

Pontevedra, martes 3 de xuño de 2025.- «É un día importante para a cidade, cun acordo entre dúas formacións políticas que pensamos diferente e que temos propostas diferentes para a cidade, pero que somos quen de chegar a acordos e entendementos. Nestes tempos, nos que está de moda a política da confrontación, da trincheira e da polarización, nós cremos na política do diálogo e o entendemento. Coido que isto é o que quere a veciñanza dunha cidade tranquila como Pontevedra e nós, sempre que sexa posible, seguiremos traballando polo acordo». Deste xeito valorou o portavoz municipal do PSOE, Iván Puentes, o novo pacto alcanzado co Goberno do BNG para a aprobación da cuarta e maior modificación de crédito deste mandato (ascende a 28 millóns), que os socialistas lograron nutrir co seu selo nunha trintena de proxectos e actuacións clave que suporán unha inxección de máis de 5 millóns de euros.

O acordo foi escenificado esta mañá na Sala de Prensa do Concello nunha comparecencia conxunta de Puentes co alcalde, Miguel Anxo Fernández Lores, quen se amosou «encantado» e que cualificou esta nova inxección orzamentaria como «un salto adiante no investimento e un impulso enorme para a actividade do Concello e para mellorar a calidade de vida dos veciños». Segundo explicou, «esta é a modificación máis grande que se fixo na historia do Concello», que ao sumarse ao orzamento de 98 millóns aprobado para 2025 (o máis elevado de Pontevedra), «vai darnos a posibilidade de facer cousas que están pendentes, que son necesarias e que significan unha mellora substancial de servizos, equipamentos e todo o que se precisa para mellorar a calidade de vida dos cidadáns». Lores avanzou que «se tódolos trámites pasan ben, a vontade é a de aprobar esta modificación de crédito nun Pleno que se celebrará o día 23 deste mes».

O líder do PSOE indicou que esta «histórica» modificación inclúe un total de 33 actuacións propostas polo seu partido, concretándose «nuns 4,8 millóns de euros de obras ‘físicas’ e outros 300.000 euros para proxectos de obra que abren a porta á súa posible incorporación en futuras modificacións de crédito ou acordos orzamentarios, se chegan». Unhas actuacións que se dividen fundamentalmente, como precisou, «en seis grupos, dos que o máis cuantioso é o que ten que ver cos espazos verdes, a sostibilidade e a loita contra o cambio climático (4,2 millóns de euros); o segundo grupo máis importante é o de novas e mellores instalacións para o deporte de base, fundamentalmente (case 700.000 euros); en terceiro lugar, a mellora do mantemento e das dotacións dos colexios públicos da cidade (153.000 euros); un destinado a fomentar a actividade económica e o emprego; outro para intentar ter uns servizos de seguridade e emerxencias mellor dotados e máis completos; e por último, unha partida que ronda os 40.000 euros para o benestar animal».

Iván Puentes comparou os excelentes resultados acadados polo PSOE na oposición co ‘papelón’ que están a protagonizar «outras formacións políticas, que me gustaría que estiveran sumadas a este acordo, pero que, vistos os precedentes, se tivera que apostar, eu diría que non vai ser así». «Eu lle pediría a Rafa Domínguez, ao candidato do PP, que en lugar de travestirse de Isabel Díaz Ayuso e facernos discursos sobre política madrileña neste Concello de Pontevedra, colla unha a unha as medidas que se inclúen nesta modificación de crédito e diga unha soa na que non está de acordo; que diga que medidas non comparte que xustifiquen o seu previsible voto en contra, porque estou convencido de que non será capaz de atopar ningunha», asegurou.

Na súa opinión, «se non hai razóns para votala en contra, a única razón que ten o Partido Popular é a de facer o único que sabe facer: intentar desgastar e embarrar a acción política no Concello de Pontevedra e poder gañar unhas hipotéticas eleccións como só gañan os mediocres, que é intentando impedir que o Goberno funcione para que a cidadanía sufra e, finalmente, estea cabreada». Non obstante, tal e como lembra Puentes, «a cidadanía de Pontevedra xa lle dixo varias veces a Rafa Domínguez que non confía nese xeito de facer política, e estou seguro de que seguirá a ser así».

Estes son os proxectos e partidas que levan a sinatura socialista:

1. Reforma integral da Praza de Pasarón: 425.000 €

2. Apertura ao público dos xardíns da Uned en Monte Porreiro: 180.000 €

3, 4 e 5. Reposición de herba artificial nos dous campos de fútbol 8 e no campo 1 de fútbol 11 do Complexo Deportivo Manolo Barreiro: 425.000 €

6. Adquisición e instalación de dous videomarcadores para o Estadio Municipal de Pasarón: 100.000 €

7. Adquisición e instalación de novo sistema de megafonía para o Estadio Municipal de Pasarón: 35.000 €

8. Obra para dotar dunha malla protectora a ponte da autoestrada AP-9 ao seu paso polo barrio de Mollavao: 70.000 €

9. Mellora do patio de Infantil do CEIP Xunqueira 2 (drenaxe e equipamento): 50.000 €

10. Faixa de protección contra incendios na zona forestal entre o Pontillón do Castro e o Monte Acibal: 100.000 €

11 e 12. Expropiación e urbanización de parcelas para a creación dun novo parque entre as rúas Ernesto Caballero e Loureiro Crespo e a vía do ferrocarril: 3.313.215 €

13. Estación pública de inflado de bicicletas na rúa Rafael Areses: 5.000 €

14. Limpeza e conservación do conxunto artístico da Illa das Esculturas: 10.000 €

15. Incremento da partida da asistencia a animais domésticos: 35.000 €

16. Estudo de alternativas para a ubicación do novo centro de protección de animais (antiga canceira municipal): 3.000 €

17. Adquisición dunha mesa de billar homologada para o club Pool Pontevedra: 6.000 €

Achegas vinculadas á redacción de proxectos para vindeiras modificacións de crédito:

18, 19, 20, 21 e 22. Estudos e proxectos técnicos de promoción e fomento do deporte e infraestruturas deportivas (225.000 €):

– Transformación dos campos de fútbol de terra do CEIP Xunqueira 2 e o IES A Xunqueira 1 en campos de herba artificial para a práctica de fútbol, rugby e béisbol

– Dotación de vestiarios femininos no Complexo Deportivo Manolo Barreiro

– Cuberta das gradas de público dos campos de fútbol 8 no Complexo Deportivo Manolo Barreiro e no Campo de Fútbol de Gatomorto

23. Beirarrúa elevada entre o edificio principal e o pavillón do CEIP A Xunqueira 1 para salvar as inundacións do patio: 3.000 €

24 e 25. Transformación en plataforma única e humanización das rúas Almirante Matos e Irmáns Nodales: 64.004,74 €

26. Renaturalización e recuperación da ribeira urbana do río Lérez na súa marxe dereita, entre a Ponte dos Tirantes e a AP-9 (rúas Rafael Areses, Xoán Manuel Pintos e Domingo Fontán): acordo do orzamento de 2025

27. Recuperación e restauración ecolóxica do río dos Gafos no treito comprendido entre a rúa Rosalía de Castro e a avenida das Corbaceiras: acordo do orzamento de 2025

Outros acordos que non implican consignación orzamentaria:

28. Estudar a viabilidade e os termos de cesión ao Concello de Pontevedra das pistas de petanca, parque infantil e pista polideportiva cuberta en Verducido (conxunto do terreo)

29. Acordo coa Xunta de Galicia e os consellos escolares do CEIP Xunqueira 2 e do IES A Xunqueira 1 para a instalación de herba artificial nos seus campos de fútbol e cesión de uso ao Concello de Pontevedra en horario non lectivo

30. Encargo do estudo de viabilidade do Porto Seco de Leborei e novas zonas de chan industrial en Pontevedra (acordo orzamento 2025)

31. Procurar horas de adestramento e competición en recinto regular e adecuado ao Club Bádminton Ravachol Pontevedra na tempada 25/26

32. Dotación dunha Praza de Bombeiros: 1 sarxento

33. Cobertura de 13 prazas da Policía Local: 8 para cubrir inmediatamente (1 de inspector principal e 7 de policía) e 5 para o vindeiro ano (1 de intendente principal e 4 de policía); estas 13 novas prazas sumaríanse ás 7 de policía que están actualmente en prácticas na Academia, cubrindo por tanto un total de 20 prazas vacantes na Policía Local durante os próximos meses