As demandas dos veciños de Mollabao serán defendidas no Pleno polo PSOE a través dunha moción que reclamará a dotación de novos espazos de lecer e deporte ao aire libre baixo o viaduto da AP-9 e a realización de obras de urbanización e cambios de sentido en rúas transversais a Rosalía de Castro

• A iniciativa plenaria, na que tamén se lle esixirá á Xunta que reubique a zona de xogos infantís e o parque biosaludable previstos inicialmente diante da gasolineira de Repsol, foi anunciada polos socialistas Iván Puentes e Marcos Rey tras unha camiñada polo barrio acompañados por membros da directiva da nova Asociación Veciñal de Mollabao

Pontevedra, xoves 28 de maio de 2026.- Caderno en man e acompañados por membros da directiva da nova Asociación Veciñal de Mollabao, os socialistas Iván Puentes e Marcos Rey achegáronse hoxe ata o barrio pontevedrés para realizar con eles unha camiñada por diversos puntos do mesmo e que serviu para verificar os graves problemas de abandono e deterioración que vén arrastrando nestes últimos anos. Conscientes de que esta zona da cidade, cuxo desenvolvemento quedou hipotecado pola implantación da factoría de Ence e a construción da ponte da autoestrada AP-9, debe ter prioridade de actuación no que queda de mandato, o portavoz municipal do PSOE anunciou considera esencial que, na concreción dos proxectos de humanización e urbanización previstos, se teñan moi en conta as demandas dos veciños e veciñas. Con tal motivo, Puentes avanzou a súa intención de impulsar unha moción plenaria na que se recollan as peticións máis importantes.

Tralo ‘roteiro’ cos voceiros veciñais, o líder socialista ratificou que Mollabao «é un dos barrios de Pontevedra que desde logo ten máis necesidades de atención e de investimentos por parte do Goberno Local. Segundo explicou, a visita cos membros do colectivo que preside Mateo González centrouse fundamentalmente en tres áreas de intervención, con diversas propostas en cada unha delas.

«En primeiro lugar, sobre a parte baixa do viaduto da autoestrada AP-9, onde o Partido Socialista tiña traballado xa no seu momento cando formaba parte do Goberno Municipal. Coincidimos cos veciños e veciñas -sinalou- en que debe ser aproveitada, ademais do estacionamento que pretende crear o actual equipo de Goberno, para xerar nesa zona novos espazos de lecer para a cidadanía».

Tal e como apuntou, o PSOE, ao igual que a veciñanza, entende que espazo comprendido entre a ría e a rúa Rosalía de Castro «debe estar destinado precisamente a esta finalidade de ocio, esparexemento e deporte ao aire libre, mentres que a zona entre Rosalía de Castro e a parte final do viaduto cara ao sur é a máis axeitada para acoller o estacionamento».

Outra das cuestións que se abordaron durante a reunión tivo que ver co deseño e as obras programadas para a reurbanización de Rosalía de Castro e dese novo vial que, a través da ‘parcela dos circos’, derivará cara á ría desde a estrada vella de Marín. «Aí coincidimos con eles en aproveitar esta actuación para efectuar diversas obras de mellora nas rúas transversais a Rosalía de Castro, con cambios de sentido de circulación e a humanización e reurbanización dalgunhas desas vías (que a reforma prevista polo Concello quere inicialmente deixar á marxe)».

Paradas de bus que desapareceron e unha zona de xogos infantís e un parque biosaludable que foron suprimidos

Un dos puntos que os socialistas reclamarán na súa moción está vencellado ás obras que a Xunta de Galicia executa na estrada vella a Marín, que, como afirmou Iván Puentes, «aínda non están rematadas e que xa sofreron varias modificacións por parte da Administración autonómica». Recollendo as demandas veciñais, o PSOE esixirá que se efectúen «varias modificacións que nós entendemos totalmente apropiadas, entre elas a de recuperar a execución dunha zona de xogos infantís e un parque biosaludable que estaban previstos diante da gasolineira de Repsol, aos que se ían destinar 70.000 euros e que foron suprimidos pola Xunta».

«A Xunta -engadiu- parece que non os quere executar e o que os veciños propoñen, con toda a lóxica do mundo, é que cando menos se poida reubicar nun espazo próximo ao que sería a zona verde proxectada no contorno de Malvar».

Por último, o líder do PSOE pontevedrés incidiu na necesidade «de falar coas empresas concesionarias do servizo de autobús para que continúen a facer parada nos puntos nos que as facían antes de que se iniciasen as obras e que, segundo denuncian os veciños, a día de hoxe sáltanse en moitas ocasións».

«En definitiva, diversas actuacións e demandas que os veciños e veciñas nos demandan, todas elas razoables e executables, e que o Partido Socialista transformará nunha moción que será levada proximamente ao Pleno do Concello de Pontevedra co obxectivo de instar, tanto ao Goberno Local como á Xunta de Galicia e ao Goberno de España (as tres administracións implicadas nos proxectos en marcha en Mollabao), a impulsalas e executalas; a que pouco a pouco, con pequenos pero constantes pasos, vaiamos mellorando a calidade de vida da veciñanza de Mollabao».

Puentes quixo tamén poñer en valor o entusiasmo e orgullo de barrio que lle transmitiron os membros da Asociación de Veciños de Mollabao, destacando o feito de que «xente tan nova e tan capacitada decida poñer unha parte do seu tempo libre para defender os intereses dun barrio cheo de potencial».