O PSOE denuncia retrasos no padrón, advirte do colapso do servizo e reclama melloras urxentes nas condicións de atención e traballo

Máis dun mes sen poder empadroar ao seu fillo recentemente nado e demoras superiores a un mes na expedición de certificados históricos evidencian un problema estrutural no servizo

Ferrol, 7 de abril de 2026.- O Grupo Municipal Socialista de Ferrol denuncia a situación de colapso que está a afectar ao servizo do Padrón Municipal de Habitantes, con retrasos inaceptables na tramitación de empadroamentos e na expedición de certificados, o que está a provocar graves prexuízos á cidadanía.

Os socialistas advirten de casos como o dun veciño de Ferrol que, máis dun mes despois do nacemento do seu fillo recentemente nado, aínda non puido completar o seu empadroamento, impedíndolle acceder a dereitos básicos como a tramitación da tarxeta de familia numerosa e ás prestacións asociadas.

Ademais, denuncian que a expedición de certificados históricos de empadroamento está a rexistrar demoras superiores ao mes, o que confirma que non se trata de situacións puntuais, senón dun problema estrutural no funcionamento do servizo. Dende o PSOE lembran que o padrón municipal é un rexistro obrigatorio e esencial, do que dependen múltiples dereitos administrativos, sociais e económicos, polo que a súa xestión debe realizarse con criterios de eficacia, axilidade e garantía de acceso.

Neste sentido, consideran que os retrasos actuais evidencian unha deficiente planificación por parte do goberno local, que non foi quen de adaptar os recursos humanos e organizativos á carga de traballo existente nin de adoptar medidas correctoras ante esta situación.

Ao mesmo tempo, o Grupo Socialista quere poñer en valor a modernización tecnolóxica do sistema de xestión do padrón, pero advirte de que esta resulta claramente insuficiente se non vai acompañada dunha mellora real das condicións nas que se presta o servizo.

O portavoz socialista, Ángel Mato, sinala que o actual espazo do Negociado de Estatística e Padrón non reúne as condicións mínimas necesarias, tal e como recollen informes do servizo de prevención de riscos laborais, nos que se advirte de problemas de espazo, accesibilidade e condicións ambientais.

Ademais, lembra que xa se produciron dúas agresións neste servizo, unha situación que evidencia a necesidade de mellorar tanto a organización como as condicións de seguridade na atención ao público.

Para o Grupo Socialista, a combinación de falta de medios, deficiencias organizativas e un espazo inadecuado está a derivar nun deterioro progresivo do servizo, afectando tanto ao persoal municipal como á cidadanía.

Así mesmo, denuncian que esta situación supón un incumprimento dos compromisos adquiridos polo actual goberno municipal durante a campaña electoral, na que prometeron unha administración máis áxil, eficiente e próxima. “O que estamos vendo é xusto o contrario: un servizo saturado, con retrasos inaceptables e condicións de traballo que non son dignas nin seguras”, sinala Mato.

Por todo isto, o PSOE de Ferrol reclama ao goberno local que adopte medidas urxentes, tanto para reforzar o servizo e reducir os tempos de tramitación, como para garantir un espazo de traballo digno, seguro e adecuado á importancia dun servizo esencial para a cidadanía.