EMAFESA pecha 2025 con perdas de 628.327 euros pese á histórica subida da factura da auga

Rafael Fernández denuncia que o Goberno presume do rescate dunha empresa que segue perdendo cartos, despois de que o PP pasase oito anos bloqueando politicamente as súas contas.

Ferrol, 31 de xullo de 2026.- O Grupo Municipal Socialista denunciou hoxe que o Goberno de José Manuel Rey Varela pretende presentar como un éxito de xestión as contas anuais de EMAFESA correspondentes ao exercicio 2025, cando a realidade é que a empresa segue rexistrando perdas por importe de 628.327,85 euros, malia a importante subida da factura da auga soportada polos veciños e veciñas de Ferrol.

Para os socialistas, os datos desmontan o relato triunfalista do Executivo municipal. As contas aprobadas reflicten que EMAFESA continúa sen alcanzar o equilibrio económico e que os seus problemas estruturais permanecen sen resolver, a pesar do enorme esforzo económico que se trasladou á cidadanía.

Rafael Fernández asegurou que “o Partido Popular pretende apropiarse dun mérito que non lle corresponde. As contas non melloran porque EMAFESA funcione mellor nin porque exista unha xestión máis eficiente. A realidade é que a empresa segue perdendo máis de 628.000 euros, despois de obrigar aos ferroláns e ferrolás a asumir unha subida histórica da factura da auga”. Fernández lembrou que o Partido Popular pasou oito anos bloqueando politicamente as contas anuais de EMAFESA cando estaba na oposición,impedindo a normalidade institucional da empresa e utilizando a súa situación económica como ferramenta de confrontación política.
“Hoxe presumen de rescatar unha empresa que eles mesmos contribuíron a bloquear durante anos. Primeiro cuestionaban sistematicamente as contas; agora queren vender como un éxito unha empresa que segue en perdas. Iso non é boa xestión, é propaganda”, afirmou.

O Grupo Socialista considera especialmente grave que, despois da importante subida do recibo da auga e da recapitalización realizada con recursos municipais, EMAFESA continúe perdendo 628.327,85 euros, demostrando que o Goberno local non foi capaz de resolver os problemas de fondo da sociedade.

“Os ferroláns fixeron un enorme esforzo económico coa promesa de garantir a viabilidade da empresa. Porén, hoxe comprobamos que ese sacrificio non serviu para acabar coas perdas. O único que conseguiu o Goberno foi cargar sobre os petos da cidadanía o custo da falta de solucións”, sinalou Rafael Fernández.

Os socialistas tamén critican que o Executivo municipal siga sen presentar un verdadeiro plan de viabilidade para EMAFESA nin explique que medidas pensa adoptar para rematar definitivamente cos resultados negativos. “Un Goberno responsable non pode limitarse a subir tarifas e presentar esa maior recadación como un éxito da súa xestión. Gobernar significa facer máis eficiente a empresa, defender os intereses de Ferrol e garantir un servizo público sostible. Nada diso aparece reflectido nas contas de 2025.”

O Grupo Municipal Socialista reiterou a súa defensa dunha EMAFESA 100 % pública, 100 % municipal e 100 % dos ferroláns e das ferrolás, convencido de que a auga é un servizo público esencial que debe estar orientado exclusivamente ao interese xeral.

“Cada euro que pagan os cidadáns debe destinarse a mellorar a rede de abastecemento, o saneamento e as infraestruturas hidráulicas, non a maquillar unha situación económica que segue sendo preocupante”, indicou Rafael Fernández.

Así mesmo, o Grupo Socialista lembrou que continúan sen resolverse cuestións fundamentais para a estabilidade económica da empresa, como a reclamación das importantes cantidades pendentes de cobramento a outras administracións e a actualización dos convenios que afectan ao abastecemento e á depuración, aspectos que levan anos lastrando as contas de EMAFESA.

Para rematar, Rafael Fernández asegurou que “o verdadeiro balance destas contas é moi diferente ao que intenta vender o Goberno: os ferroláns pagan máis pola auga, EMAFESA continúa perdendo 628.327 euros e Rey Varela segue sen ofrecer un proxecto serio para garantir o futuro da empresa. Ferrol merece unha empresa pública forte, transparente e eficiente, non un Goberno que confunda propaganda con xestión”.