O Grupo Municipal Socialista de Ferrol esixe a integración definitiva do bus lanzadeira para converter A Malata nun aparcadoiro disuasorio permanente
Julián Reina critica que o goberno local limite a “parches” de Semana Santa un servizo que debería funcionar todo o ano para desconxestionar o centro de vehículos.
Os socialistas sinalan que un contrato de 13.000 euros é “insuficiente e falto de ambición” para un modelo de mobilidade moderna e sostible.
Ferrol, 25 de marzo de 2026. O Grupo Municipal do PSdeG-PSOE de Ferrol, a través do seu concelleiro Julián Reina, instou hoxe ao goberno local a dar un paso definitivo na modernización da mobilidade da cidade.
Os socialistas demandan que o servizo de autobuses lanzadeira entre A Malata e o centro non sexa un recurso puntual de vacacións, senón que se integre de xeito permanente na concesión do transporte urbano para operar durante todo o ano.
Unha herdanza de éxito: O precedente de 2022
O PSdeG lembra que este servizo é froito dunha estratexia de mobilidade deseñada e executada polo PSOE en abril de 2022
Naquel momento, a proba piloto durante a Semana Santa demostrou que a cidadanía está disposta a usar alternativas se estas son eficaces. O concelleiro Julián Reina, responsable daquela iniciativa, destaca: “No 2022 deseñamos este plan cun obxectivo claro: demostrar que Ferrol responde se se lle dan alternativas reais. Aquel éxito rotundo non debeu ser o teito, senón o chan sobre o que construír un Ferrol máis habitable. O que naceu como unha solución de vangarda non pode quedar conxelado como un simple recurso de emerxencia para festivos”.Máis alá da Semana Santa: A Malata como aparcadoiro disuasorio real
A principal crítica dos socialistas céntrase na falta de visión estratéxica do actual executivo. Para o PSdeG, destinar 13.000 euros a un contrato menor para uns días de servizo é “gastos sen percorrido”.
A proposta socialista vai moito máis alá:
• Operatividade os 365 días: A lanzadeira debe funcionar todo o ano para que o aparcadoiro da Malata cumpra a súa función de aparcadoiro disuasorio, permitindo que traballadores e visitantes deixen o coche na periferia.
• Desconxestión do centro: Unha liña permanente reduciría drasticamente a presión de tráfico no casco histórico e en barrios como A Magdalena ou Ferrol Vello, mellorando a calidade do aire e a fluidez do tráfico.
• Integración na concesión: O PSOE esixe que esta liña se inclúa formalmente no contrato de transporte urbano para garantir frecuencias estables, prezos integrados e unha planificación profesional que un contrato menor de “parche” non pode ofrecer.
“Pasar do parche á solución definitiva”
Para Julián Reina, a actitude do goberno actual amosa unha “falta de valentía política” que prexudica o crecemento da cidade: “A utilidade da lanzadeira xa non está en dúbida; o que está en dúbida é a capacidade deste goberno para xestionar o Ferrol do futuro. Non podemos pretender que a xente deixe o coche na Malata se o bus só pasa en Semana Santa.
O que a cidade precisa é que o goberno local sexa valente e dote a esta liña de estabilidade estrutural. É o momento de pasar do parche á solución definitiva para facer de Ferrol unha cidade máis cómoda e moderna”, conclúe Reina
Palabra clave
También te puede interesar...
RRSS