O PSOE valora a modernización tecnolóxica do padrón pero reclama un espazo digno e seguro para o persoal e a atención á cidadanía

Rafael Fernández advirte de que o actual espazo do Negociado de Estatística e Padrón non cumpre as condicións mínimas, pese a existir informes de prevención e tras rexistrarse dúas agresións.

Ferrol, 12 de marzo de 2026.- O Grupo Municipal Socialista de Ferrol valora positivamente a modernización tecnolóxica do sistema de xestión do Padrón Municipal de Habitantes, ao considerar que a actualización das ferramentas informáticas é necesaria para mellorar a eficiencia administrativa e a atención á cidadanía.

Os socialistas confían en que, no proceso de implantación do novo sistema, se teña contado coa opinión e coa experiencia do persoal do Negociado de Estatística e Padrón, xa que son os traballadores e traballadoras do servizo quen coñecen de primeira man as necesidades reais do funcionamento diario.

Porén, desde o PSOE lembran que a modernización tecnolóxica debe ir acompañada tamén de melloras nas condicións nas que se presta o servizo, tanto para o persoal municipal como para a cidadanía que acode a realizar trámites.

O concelleiro socialista Rafael Fernández sinala que o actual espazo no que se presta este servizo non reúne as condicións mínimas necesarias para o desenvolvemento do traballo, unha situación que xa foi advertida en informes do servizo de prevención de riscos laborais.

Segundo estes informes, existen problemas relacionados coa falta de espazo suficiente, co acceso á zona de traballo e coas condicións ambientais do local. Ademais, Fernández lembra que xa se rexistraron dúas agresións neste servizo, unha situación que pon de manifesto a necesidade de mellorar as condicións de seguridade e organización do espazo, tanto para o persoal como para a atención ao público.

O Grupo Socialista considera que o actual espazo non cumpre cos requisitos mínimos de seguridade, ergonomía e organización do traballo establecidos na normativa de prevención de riscos laborais, polo que reclama ao goberno municipal que actúe con responsabilidade e busque unha ubicación digna e adecuada para o Negociado de Estatística e Padrón.

Para os socialistas, a modernización dos servizos municipais debe ir acompañada tamén de espazos de traballo seguros, organizados e acordes coa importancia dun servizo esencial para a cidadanía como é o padrón municipal.