O PSdeG reclama á Xunta a instalación urxente dun sistema de aire acondicionado no Centro de Saúde de Ordes

• Os socialistas levarán ao Parlamento unha iniciativa para esixir a climatización do centro e coñecer as medidas previstas polo Sergas para rematar coas altas temperaturas nas instalacións.

O PSdeG rexistrou no Parlamento de Galicia unha iniciativa para reclamar á Xunta a instalación urxente dun sistema de climatización no Centro de Saúde de Ordes, despois das reiteradas queixas trasladadas por profesionais e persoas usuarias polas elevadas temperaturas que se rexistran nas instalacións.

A voceira socialista en Ordes, Noelia Rivadas, denuncia que “no interior da instalación estanse rexistrando temperaturas moi elevadas que chegan a roldar os 35 graos, debido a que o edificio non dispón de aire acondicionado nin conta con sistemas adecuados de protección fronte ás altas temperaturas”. Ademais, lembra que entre os pacientes atendidos hai “nenos e nenas, persoas maiores e pacientes con problemas crónicos de saúde, colectivos especialmente vulnerables ás altas temperaturas”.

Pola súa banda, o deputado socialista Aitor Bouza denuncia que a ausencia dun sistema de aire acondicionado no Centro de Saúde de Ordes dificulta a prestación dunha atención sanitaria en condicións axeitadas durante os episodios de calor extrema.

Os socialistas lembran que os centros sanitarios deben garantir unhas condicións ambientais adecuadas para ofrecer unha asistencia sanitaria de calidade e preservar a seguridade e o benestar tanto das persoas usuarias como dos profesionais. Ademais, subliñan que os episodios de calor extrema son cada vez máis frecuentes como consecuencia do cambio climático, polo que resulta imprescindible adaptar as infraestruturas sanitarias a esta nova realidade.

Por este motivo, o Grupo Parlamentario Socialista insta á Xunta de Galicia a dotar o Centro de Saúde de Ordes dun sistema de climatización adecuado mediante a instalación de aire acondicionado e a executar con carácter urxente as actuacións necesarias para que este sistema estea operativo no menor prazo posible.

Paralelamente, os socialistas preguntarán ao Goberno galego se ten constancia das queixas polas altas temperaturas no interior do centro, se considera aceptable que unha infraestrutura sanitaria funcione sen aire acondicionado durante os episodios de calor e que medidas ten previsto adoptar para mellorar a climatización das instalacións. Así mesmo, interesaranse por se a Xunta habilitará unha partida orzamentaria específica para acometer esta actuación.

“É urxente que a Xunta de Galicia e, en concreto, a Consellería de Sanidade adopten medidas inmediatas para garantir unhas condicións adecuadas tanto para os profesionais como para a cidadanía”, conclúe Rivadas.