O PSOE-PSdeG apoia as reivindicacións dos sindicatos de Navantia e acusa a Rey Varela de oportunismo

-Os socialistas critican a “incoherencia” de Rey Varela, que hai un ano votou en contra do incremento do gasto en Defensa que sostén a actividade do naval e hoxe reclama investimentos

– “En 2017 as gradas do estaleiro estaban baleiras; hoxe Ferrol desenvolve o maior programa de construción naval militar da súa historia co Goberno socialista de España”, recordan desde o PSdeG-PSOE provincial

O PSdeG-PSOE provincial da Coruña expresou hoxe o seu pleno apoio ás reivindicacións formuladas polos sindicatos de Navantia sobre o futuro dos estaleiros de Ferrol e Fene, e acusou ao alcalde de Ferrol, José Manuel Rey Varela, de “oportunismo político” e de chegar tarde a unha loita que os traballadores, o movemento sindical e a comarca levan décadas defendendo.

Os socialistas consideran que Rey Varela intenta agora presentarse como o gran defensor do naval ferrolán, pero lembran unha realidade que o alcalde omite deliberadamente: os estaleiros de Ferrol viven hoxe a maior carga de traballo da súa historia recente grazas ás decisións adoptadas polo Goberno de España.

As fragatas F-110, a modernización das F-100 e o novo buque de aprovisionamento en combate para a Armada constitúen unha carteira histórica para o naval ferrolán, con miles de empregos directos e indirectos para Ferrolterra. Só o programa das F-110 supón arredor de 4.500 millóns de euros de investimento e preto de 9.000 empregos, ao que se suma a Fábrica Dixital de Bloques, chamada a marcar un antes e un despois no futuro industrial do estaleiro de Ferrol.

Para o PSdeG-PSOE provincial, esta nova fábrica é un auténtico punto de inflexión: sitúa Ferrol nunha nova etapa da construción naval, máis dixital, máis automatizada, máis competitiva e con capacidade para afrontar programas de gran complexidade tecnolóxica. Supón unha transformación estrutural do estaleiro que reforza o seu papel como referente da construción naval pública en España e en Europa.

Os socialistas lembran, ademais, que Navantia vén realizando desde 2019 un esforzo inversor sostido para modernizar os seus centros produtivos, cunha media próxima aos 100 millóns de euros anuais destinados á transformación industrial e tecnolóxica dos estaleiros. “Esa é a diferenza entre falar do naval e tomar decisións reais para garantir o seu futuro”, subliñan.

“O certo é que en 2017 as gradas do estaleiro estaban baleiras e hoxe Ferrol desenvolve o maior programa de construción naval militar da súa historia co Goberno socialista de España”, recordan desde o PSdeG-PSOE provincial. Para os socialistas, Rey Varela “chega tarde” porque esa non foi a súa actitude cando había un Goberno do PP en Madrid. “Reclama hoxe o que non reclamou cando gobernaba Rajoy e os estaleiros vivían anos de incerteza, coas grandes decisións industriais para Ferrol sen chegar. A súa capacidade reivindicativa parece activarse só cando o Goberno é socialista”, sosteñen.

A formación socialista critica que Rey Varela pretenda agora apropiarse dunha reivindicación histórica que pertence aos traballadores, aos sindicatos e á comarca, como son o dique cuberto, a modernización dos estaleiros e un plan de emprego ambicioso para Ferrol e Fene. O PSdeG-PSOE lembra que foi Ángel Mato, durante a súa etapa como alcalde, quen xa defendeu publicamente o dique cuberto e a modernización dos estaleiros, e quen reclamou que estas actuacións se incorporasen ás oportunidades de financiamento europeo para facilitar a súa execución.

Voto en contra do investimento en Defensa

O PSdeG-PSOE provincial sinala ademais que a incoherencia do alcalde quedou especialmente patente hai apenas un ano, cando Rey Varela votou en contra dunha moción que apoiaba o incremento do investimento estatal en Defensa ata o 2% do PIB, un sector estratéxico para a economía da comarca e directamente vinculado á carga de traballo da construción naval militar.

Aquel voto levou aos socialistas a pedir a súa dimisión por considerar inaceptable que o alcalde dunha cidade como Ferrol se posicionase contra un gasto estable nun sector clave para o presente e o futuro de Navantia e da industria auxiliar. Para o PSdeG-PSOE, “non se pode reclamar carga de traballo para os estaleiros en Ferrol e votar en contra dos recursos que fan posible esa carga”.

Os socialistas consideran que Rey Varela utiliza agora o debate sobre o Plan Estratéxico de Navantia como escenario de confrontación partidista, mentres evita recoñecer que a principal transformación industrial que vive Ferrol está vinculada ás decisións adoptadas polo Executivo de Pedro Sánchez: as F-110, a modernización das F-100, o novo BAC, os investimentos de Defensa, a Fábrica Dixital de Bloques e a aposta pola eólica mariña.

O PSdeG-PSOE provincial seguirá defendendo, xunto aos socialistas de Ferrol, os sindicatos e o conxunto da comarca, todos os investimentos necesarios para reforzar o futuro industrial da ría, garantir máis emprego, modernizar os estaleiros e asegurar que Navantia Ferrol e Fene continúen sendo un referente estratéxico da construción naval pública.