O PSdeG reclama a residencia de maiores en Oza-Cesuras “prometida hai máis de 12 anos polo Goberno da Xunta”

• Silvia Longueira lamenta que “se incumpriron a práctica totalidade dos compromisos” despois da fusión de Oza e Cesuras impulsada por Feijóo

O PSdeG-PSOE reclama que se constrúa a residencia de maiores no Concello de Oza-Cesuras que foi “prometida hai máis de 12 anos polo goberno da Xunta de Galicia do PP”.

Así o expresou a deputada socialista no Parlamento galego Silvia Longueira, máis de 12 anos despois de que se dera a fusión dos concellos de Oza e Cesuras promovida polo entón presidente da Xunta, Alberto Núñez Feijóo.

Longueira lembra que o propio expresidente da Xunta de Galicia afirmaba que “esa fusión ía mellorar a vida de ambos concellos e proverlos dunha xestión municipal máis eficaz”.

Porén, para a socialista, a realidade é “que se incumpriron a práctica totalidade dos compromisos, e quedou basicamente en promesas que unicamente foron usadas para comprar a vontade” da veciñanza dos dous municipios.

“Entre esas promesas estaba a construción dunha residencia para maiores que nunca viu a luz, pese a ter pintado nun papel incluso en que terrenos a ían construir”, critica a deputada socialista, que engade que veciños e veciñas, “ata o día de hoxe, seguen esperando”.

Por todo isto, o Grupo Parlamentario Socialista presentará na cámara galega una iniciativa coa que preguntarán á Xunta cando estiman que se levarán a cabo os acordos da unión dos concellos e que a insta a que presente no prazo de dous meses a planificación existente para a construción da residencia. Así mesmo, a iniciativa demanda ao Goberno galego que presente un informe sobre os efectos económicos da fusión, tal e como se estimaba no documento base da mesma, xa que “doce anos despois da fusión non se coñecen os datos de bonanza económica prometidos”.