O PSdeG leva ao Parlamento a paralización das obras no CIFP Imaxe e Son da Coruña tras dous anos sen auditorio operativo

A formación socialista pregunta á Xunta cando rematarán os traballos e alerta do impacto na formación do alumnado

O Grupo Parlamentario Socialista rexistrou no Parlamento de Galicia unha iniciativa para reclamar información sobre a paralización das obras no CIFP Imaxe e Son da Coruña, cuxo salón de actos, segundo indican, leva dous cursos sen estar operativo.

Segundo explicaron os socialistas, o auditorio é unha peza “clave” para a formación do alumnado en áreas como iluminación, son, produción e realización de espectáculos. Pola contra, permanece inutilizable tras unha intervención iniciada para modernizar as instalacións.

Os socialistas explicaron que en novembro de 2022 anunciouse a licitación das obras para a renovación integral do salón de actos cun prazo de execución de seis meses. Non obstante, os traballos quedaron estancados ao detectarse deficiencias non previstas, deixando o espazo completamente desmontado, sen butacas nin escenario e sen posibilidade de uso.

A dirección do centro sinala que esta situación está a ter efectos directos na aprendizaxe, ao limitar ensaios e prácticas técnicas fundamentais que requiren dun espazo escénico adecuado. Mentres, a comunidade educativa trata de suplir estas carencias “con improvisación e imaxinación”, o que, segundo a iniciativa presentada, provoca a perda de contidos e experiencias esenciais para a formación do alumnado.

Neste contexto, a deputada socialista Silvia Longueira explicou que a Escola de Imaxe e Son da Coruña é “unha das escolas referentes dentro do audiovisual en España e referente total para os nosos creadores”, e advertiu de que o alumnado leva dous anos sen poder realizar prácticas fundamentais de iluminación, son ou escenografía debido á paralización das obras.

Así mesmo, indicou que o seu grupo levará ao Parlamento unha batería de iniciativas nas que se inclúe unha pregunta concreta para coñecer cando ten previsto a Xunta rematar estas actuacións, xa que, segundo sinalou, o alumnado “non pode rematar nin pode practicar a ensinanza que se leva a cabo” no centro. A iniciativa socialista insta á Xunta de Galicia a finalizar as obras antes do inicio do vindeiro curso, remitir un informe detallado sobre as causas do atraso e habilitar de urxencia un espazo alternativo que permita desenvolver as actividades formativas mentres o auditorio continúe inutilizado.