O PSdeG de Rianxo critica o goberno de Julián Bustelo por non dar resposta á proposta socialista sobre o impacto do IBI

Engaden que todo esto ocorre mentres avanza na regulación catastral e licita un contrato para incrementar a recadación.

Rianxo. O PSdeG-PSOE de Rianxo manifesta a súa profunda preocupación pola deriva económica do Concello de Rianxo e a falta de transparencia coa que o alcalde Julián Bustelo está a xestionar os recursos municipais. A recentemente publicada licitación dun contrato para incrementar a recadación municipal é a mostra máis evidente da situación financeira crítica acumulada nos dous últimos anos de mandato.

Desde outubro de 2024, os socialistas de Rianxo solicitaron formalmente ao goberno local a posta en marcha dun proceso de avaliación do impacto do IBI sobre a veciñanza, coa intención de valorar medidas de regulación fiscal que non penalizasen ás familias nin ás pequenas empresas. A proposta incluía a análise do padrón, a revisión de bonificacións e un estudo serio sobre a progresividade fiscal. A día de hoxe, o goberno de Bustelo non deu resposta, e pola contra, avanza nun proceso de regularización catastral que previsiblemente derivará nun incremento de recibos para moitos fogares.

Cómpre lembrar que os socialistas levamos advertindo esta situación dende abril de 2024, cando se aprobou un orzamento municipal con partidas claramente infravaloradas, sen respaldo suficiente para cubrir o funcionamento ordinario da administración local. Desde entón, vimos observando de maneira continua reparos de intervención por falta de crédito e desaxustes orzamentarios, reparos que o alcalde levanta sistematicamente, evidenciando unha preocupante falta de rigor na execución do orzamento.

Este contexto de incremento da presión fiscal non pode desligarse da grave situación económica que está a vivir o Concello. Concretamente, no ano 2024, co inicio do actual goberno e coa aprobación do orzamento municipal, cesouse o pago á empresa concesionaria do servizo de abastecemento e saneamento, comprometendo a continuidade e calidade dun servizo esencial.

Desde o grupo socialista presentouse unha moción solicitando información concreta sobre esta débeda, sen obter resposta a día de hoxe. Segundo as estimacións que manexamos, a débeda con esta empresa rolda os 500.000 euros, unha cifra que evidencia a nefasta planificación económica do actual goberno. A esta situación hai que engadir máis de 800.000 euros en obras subvencionadas pendentes de execución, o que implica non só a paralización de investimentos clave para Rianxo, senón tamén o risco real de perder fondos públicos concedidos por outras administracións.

Descoñécese, a maiores, cal é a situación actual de pagos á empresa que xestiona a EDAR de Rianxo. Existen obras executadas sen crédito ou utilizando subvencións con fins distintos aos previstos, constantes atrasos nos pagos da luz e aos provedores, así como facturas sen retención de crédito. A isto súmase a alarmante realidade dalgúns departamentos municipais cos créditos esgotados e sen capacidade de xestión ordinaria.

Xa na aprobación do POS+ 2025, os socialistas advertimos tamén do desvío de fondos desta subvención para cubrir gastos estruturais do Concello, nun intento de tapar buracos sen afrontar a realidade económica. Isto supón hipotecar o investimento no futuro por non asumir a responsabilidade no presente.

É inadmisible que a estas alturas —a 4 de agosto de 2025— o Concello aínda non teña presentada a conta xeral de 2024, non dispoñamos do listado de facturas pendentes, nin se nos facilitase o período medio de pago a provedores. Esta opacidade e falta de control económico vulnera o principio básico de responsabilidade institucional e prexudica gravemente ao funcionamento municipal.

Desde o PSdeG-PSOE de Rianxo esiximos ao alcalde Julián Bustelo que compareza publicamente para explicar cal é a situación real das arcas municipais, que dea resposta inmediata ás propostas de fiscalidade responsable formuladas polo noso grupo, e que poña fin á improvisación económica que está a pór en risco a viabilidade dos servizos públicos.

Rianxo non merece un goberno que eluda responsabilidades, nin que cargue sobre os veciños e veciñas os erros dunha xestión deficiente. Non se pode xestionar nin gastar o que non se ten. É hora de que o alcalde asuma a realidade e actúe con responsabilidade.