O PSdeG de Malpica critica a falta de diálogo do goberno local e mostra a súa sorpresa pola abstención do BNG ante a proposta de negociar entre todos os grupos o POS da Deputación

– Os socialistas propuxeron no pleno do pasado xoves adiar a aprobación do POS+ para buscar un acordo entre todos os grupos, pero a proposta foi rexeitada cos votos do PP e a abstención do BNG

O grupo municipal do PSdeG-PSOE no Concello de Malpica lamenta a falta de vontade de diálogo do goberno local do PP, en minoría con 6 concelleiros, respecto á proposta de distribución do Plan Único (POS+) da Deputación da Coruña, que se tratou no pleno ordinario celebrado o xoves.

Segundo explicou o voceiro socialista, Walter Pardo, “o alcalde comprometérase a dialogar e consensuar os temas importantes coa oposición, pero neste caso non houbo ningún tipo de contacto previo co noso grupo para negociar unha proposta que consideramos relevante”. Pardo afirmou que “a nós ninguén nos chamou para negociar e dialogar sobre o POS, que nos parece un punto moi importante porque ao final era unha subvención que vén da Deputación e que hai que repartir en obras”.

Ante esta situación, o PSdeG-PSOE propuxo deixar o punto encima da mesa e solicitar unha reunión cos distintos grupos da corporación para consensuar unha proposta antes da súa remisión á Deputación, dado que aínda había tempo suficiente para presentala. A votación desta proposta resultou rexeitada cos votos en contra do PP (6), os votos a favor do PSOE (4) e do concelleiro independente (1), e a abstención do BNG (2).

O grupo socialista expresa a súa perplexidade pola posición do BNG neste asunto. “O que nos resulta sorprendente é a abstención do BNG. Iso quere dicir que ao BNG igual non lle interesa negociar o POS da Deputación ou que xa o tiñan falado co grupo de goberno”, afirmou Walter Pardo.

Finalmente, o punto foi aprobado cos votos favorables do PP e a abstención do resto dos grupos. Os socialistas insisten en que “parece que o PP e o BNG comezan a entenderse moi ben”, e consideran que existe “unha complicidade que se fai visible en varios plenos, como no caso do Plan Económico-Financeiro aprobado grazas á abstención do BNG”.

Solicitudes no turno de rogos

Durante o turno de rogos, o PSdeG-PSOE trasladou dúas peticións ao goberno local. A primeira, que se atenda a reclamación da ANPA do C.E.I.P. Joaquín Rodríguez Otero de Buño, que demanda a posta en marcha dun servizo de madrugadores. “É un servizo que daría atención á mínima a 14 nenos cuxos pais necesitan conciliar para poder traballar”, explicou Pardo, engadindo que “no rural é moi importante, porque se non teñen este servizo igual teñen que buscar outro sitio onde vivir”.

A segunda proposta refírese á necesidade de regular o uso das praias municipais. O grupo socialista solicitou a elaboración dunha ordenanza que impida a reserva anticipada de espazo mediante a colocación de parasois ou toallas, e que regule tamén o acceso e a estancia de vehículos como caravanas. “Xa empeza a haber conflitos, sobre todo na Area Maior de Malpica, onde hai xente que deixa as hamacas dende as oito da mañá para reservar sitio todo o día, e outras persoas que chegan con caravanas ou coches e atrancan os accesos as diferentes praias do concello” sinalou o voceiro.