O PSdeG apoia a concentración dos propietarios das Fragas do Eume e esíxelle á Xunta escoitar as súas reivindicacións

• Aitor Bouza lembra que o Grupo Parlamentario Socialista rexistrou unha emenda aos Orzamentos de 2026 para que a Xunta atenda as reivindicacións do colectivo

José Ramón Gómez Besteiro, secretario xeral do PSdeG, e Aitor Bouza, deputado socialista no Parlamento galego, acompañaron hoxe aos propietarios e propietarias das Fragas do Eume na concentración convocada pola Asociación Parque Natural Fragas do Eume, Naturaleza y Desarrollo diante do Parlamento de Galicia, onde reclamaron que a Conselleira de Medio Ambiente os reciba para atender as súas demandas.

Aitor Bouza destacou que esta mesma petición xa fora trasladada polo Grupo Parlamentario Socialista durante a comparecencia da conselleira, subliñando a urxencia de escoitar ao colectivo e cumprir os compromisos asumidos. De igual xeito, o deputado socialista lembrou tamén que o grupo socialista presentou unha emenda aos Orzamentos da Xunta para 2026, na que se propón que “sexa a Xunta a que se encargue de atender estas demandas”.

O deputado reiterou o apoio do PSdeG aos veciños e veciñas das Fragas do Eume e instou á “Xunta de Rueda que non mire cara outro lado e que se poña mans á obra para traballar da man con todos estes propietarios e propietarias, atendendo ás súas reivindicacións”. Destacou que “non son máis que cuestións que se poden xa abordar” e explicou que noutras comunidades autonomas, “xa se están implementando estas cuestións, polo que Galicia non pode quedar á marxe no ámbito medioambiental, sobre todo en relación coas Fragas do Eume”.

O socialista rematou salientando a importancia de garantir “os recursos económicos, recursos materiais e todos os plans e calendarizacións que sexan necesarios” para atender de forma efectiva as demandas do colectivo, co obxectivo de que “unha das prioridades dentro da nosa comunidade autónoma sexa a defensa do noso medio natural, como é o caso das Fragas do Eume”.