O Pleno de Monfero aproba dúas mocións socialistas para mellorar o CPI Virxe da Cela e reclamar á Xunta actuacións fronte ao aumento da presenza de xabarís

O Pleno de Monfero aprobou dúas mocións presentadas polo Grupo Municipal Socialista. Por unha banda a mellora das instalacións do CPI Plurilingüe Virxe da Cela e, por outra, a adopción de medidas por parte da Xunta de Galicia ante o incremento da presenza de xabarís no municipio.

A primeira das mocións céntrase na necesidade de modernizar as instalacións do CPI Plurilingüe Virxe da Cela, un centro que neste ano 2026 celebra o seu cincuenta aniversario e que, segundo recolle a iniciativa socialista, presenta necesidades de actuación derivadas da súa antigüidade e demandadas pola comunidade educativa.

A proposta aprobada insta á Xunta de Galicia a acometer a retirada e substitución da cuberta do edificio de Educación Infantil e Primaria, actualmente realizada en uralita e que pode conter amianto, o que consideran “unha actuación necesaria para garantir a saúde e cumprir a normativa”.

Así mesmo, a moción reclama a substitución de todas as ventás do edificio para mellorar a eficiencia enerxética, o illamento térmico e acústico e o confort da comunidade educativa.

A iniciativa tamén solicita á Administración autonómica a reparación das deficiencias existentes na cociña do comedor escolar, entre elas o estado do chan, do falso teito e diversas fendas nas paredes, co obxectivo de evitar que estas carencias poidan comprometer a apertura do servizo de comedor no vindeiro curso escolar.

Por outra banda, o pleno tamén aprobou a moción presentada polo Grupo Municipal Socialista para instar á Xunta de Galicia a actuar ante o incremento da presenza de xabarís no concello.

O texto aprobado recolle a preocupación polos danos que estes animais están a provocar en cultivos, explotacións gandeiras, fincas, hortas e zonas próximas ás vivendas, así como polos riscos que supoñen para a seguridade viaria e para a veciñanza.

A moción solicita á Xunta de Galicia que exerza de maneira inmediata e efectiva as súas competencias en materia de control da poboación de xabarís e que poña en marcha un plan específico de actuación para o Concello de Monfero, incrementando as medidas de prevención e captura cando resulte necesario, incluídas autorizacións de batidas de control.

Desde o Grupo Municipal Socialista destacan que ambas iniciativas responden a necesidades reais do municipio e teñen como finalidade mellorar a calidade de vida da veciñanza, reforzar a seguridade e reclamar que a Xunta de Galicia exerza as súas competencias tanto na conservación e mellora das infraestruturas educativas como na xestión da fauna salvaxe.