O pleno de Mañón aproba a moción do PSOE para nomear a Lino Novás Calvo fillo predilecto do municipio

• Os socialistas cren que deste xeito se fai “xustiza cun dos nosos veciños máis universais”

O pleno do Concello de Mañón aprobou o pasado xoves, por unanimidade de todos os grupos, a moción presentada polo PSOE para recoñecer e honrar a figura do escritor e xornalista Lino Novás Calvo, unha das personalidades máis destacadas vinculadas ao municipio.

Con este acordo, Mañón dá un paso decisivo para saldar unha débeda histórica cun autor de enorme relevancia, que levou o nome de Mañón e de Galicia máis alá das nosas fronteiras sen ter recibido ata agora un recoñecemento institucional acorde á súa traxectoria.

Nado en Mañón en 1903, Lino Novás Calvo emigrou sendo neno a Cuba, onde desenvolveu boa parte da súa carreira literaria e xornalística. Considerado un dos grandes renovadores do relato en lingua española, destacou pola súa capacidade para combinar técnicas narrativas innovadoras cunha fonda sensibilidade social. Foi autor de obras recoñecidas como ‘El negrero’ ou ‘La luna nona’, e está considerado un precursor do realismo máxico latinoamericano.

Ademais da súa faceta como narrador, Novás Calvo foi un prestixioso xornalista e tradutor, colaborando con importantes medios e introducindo ao público hispanofalante a autores internacionais de referencia. Tras o triunfo da revolución cubana exiliouse nos Estados Unidos, onde continuou a súa actividade intelectual e docente ata o seu falecemento en 1983.

A través da iniciativa presentada polo grupo socialista, o Concello acorda iniciar os trámites para o seu nomeamento como Fillo Predilecto de Mañón, así como para dedicarlle unha rúa, praza ou espazo público que perpetúe a súa memoria.

O texto aprobado contempla tamén o impulso de actividades culturais, educativas e divulgativas que permitan achegar a súa obra e a súa figura á cidadanía, especialmente ás novas xeracións, contribuíndo así a reforzar o coñecemento do patrimonio cultural propio.

Dende o PSOE de Mañón, o portavoz Martín Rego destaca que este acordo “supón facer xustiza cun dos nosos veciños máis universais e avanzar no recoñecemento que merece unha figura clave da literatura e do xornalismo do século XX, que contribuíu a engrandecer a historia de Mañón”.