O PSdeG lamenta profundamente o voto en contra de Rueda ás emendas orzamentarias para garantir os dereitos dos propietarios das Fragas do Eume

• Os socialistas critican que o Partido Popular rexeitase incorporar unha partida orzamentaria para atender unhas reivindicacións xustas e legalmente recoñecidas.

O PSdeG lamenta o voto en contra do Partido Popular liderado polo presidente da Xunta de Galicia, Alfonso Rueda, ás emendas presentadas polo Grupo Socialista aos orzamentos para o 2026, nas que se solicitaba a incorporación dunha partida específica para garantir as reivindicacións das persoas propietarias das Fragas do Eume. 

Desde o partido socialista consideran que esta decisión “evidencia o absoluto desprezo do Goberno galego polos dereitos dos propietarios e propietarias das Fragas do Eume”, así como “é un grave desleixo nas competencias propias da Xunta, específicamente no ámbito do medioambiente”, segundo indicou Aitor Bouza, deputado do PSdeG. 

Os socialistas agardan que ao longo de 2026 a Xunta de Galicia rectifique a súa postura, xa que o rexeitamento destas enmendas supón ignorar as demandas dos propietarios e propietarias, que están inclusive recoñecidas legalmente. 

Neste sentido, desde o PSdeG aseguran que continuarán traballando da man das persoas propietarias das Fragas do Eume para lograr que se incorpore a correspondente partida orzamentaria. Para iso, anuncian que levarán novas iniciativas parlamentarias nas que se esixa a modificación dos orzamentos ao longo de 2026, co obxectivo de garantir os recursos necesarios que reclaman os afectados e afectadas desde hai anos. 

Esta será a folla de ruta do PSdeG durante o ano 2026, reiterando o seu compromiso de estar ao carón da cidadanía e defender os seus dereitos fronte á falta de sensibilidade do Goberno galego liderado polo presidente Rueda.