O PSdeG de Cabanas reúnese coas asociacións veciñais, culturais e deportivas para falar das novas subvencións da Deputación

• Participaron na xuntanza a voceira socialista Concepción Rodríguez, o deputado de Deportes provincial Antonio Leira e o asesor Manuel Doce

O PSdeG-PSOE de Cabanas celebrou unha reunión informativa dirixida ás asociacións veciñais, culturais e deportivas do municipio, co obxectivo de dar a coñecer a nova liña de subvencións da Deputación da Coruña destinada a apoiar as actividades e proxectos deste tipo de entidades.

O encontro estivo presentado pola portavoz do grupo municipal socialista, Concepción Rodríguez, que destacou a relevancia do tecido asociativo na vida social e cultural de Cabanas. Nas súas palabras, “as asociacións son a alma dos nosos barrios e parroquias, e o seu traballo merece o apoio e o recoñecemento das institucións públicas”.

Como relatores participaron Antonio Leira, deputado provincial encargado da Área de Deportes, e mais Manuel Doce, asesor de Deportes. Ofreceron unha explicación detallada sobre as características da convocatoria, os requisitos de participación e os prazos previstos para a tramitación das axudas.

Leira e Doce resolveron as dúbidas expostas polas persoas representantes das asociacións cabanesas, e animaron ás entidades locais a presentar as súas solicitudes para as subvencións do exercicio 2026.

O acto concluíu cun espazo de diálogo aberto no que as asociacións participantes compartiron as súas inquietudes e propostas, valorando de forma moi positiva a iniciativa do grupo socialista por facilitar o acceso á información e achegar os recursos da Deputación aos colectivos do municipio. “Queremos que ningunha asociación de Cabanas quede sen optar a estas axudas por falta de información ou asesoramento. Desde o PSdeG-PSOE seguiremos acompañando ao tecido asociativo en todo este proceso”, sinalou a portavoz Concepción Rodríguez.