O PSOE de Coristanco alerta sobre o Plan Económico-Financeiro 2025-2026 e critica a xestión do PP

– Os socialistas acusan ao goberno local de ocultar a realidade económica do Concello e advirten de posibles recortes e restricións nos servizos públicos

O Grupo Municipal do PSOE de Coristanco denuncia o que considera un “maquillaxe contable” por parte do goberno local do Partido Popular e advirte sobre as consecuencias da presentación dun Plan Económico-Financeiro (PEF) para os anos 2025-2026, que, segundo os socialistas, podería derivar en recortes e limitacións nos servizos municipais.

Segundo o voceiro socialista, José Manuel Pérez Abelenda, a necesidade de elaborar este plan é consecuencia directa da política orzamentaria desenvolvida polo executivo local.

“O PP leva anos inflando previsións e maquillando cifras para proxectar unha imaxe de boa xestión, pero a realidade é que agora se ven obrigados a presentar un Plan Económico-Financeiro”, afirmou. Ao seu xuízo, este feito pon en cuestión a transparencia e o rigor da xestión do goberno municipal.

Desde o PSOE critícase que, en lugar de actuar con responsabilidade e clareza, o executivo optase por difundir unha mensaxe triunfalista afastada da situación real. “Estamos ante un goberno que prefire vender propaganda antes que xestionar con honestidade e realismo”, apuntou Abelenda, quen tamén advertiu de que o PEF podería implicar “recortes, paralización de investimentos e restricións nos servizos públicos”.

O portavoz socialista lamenta, ademais, a falta de diálogo por parte do alcalde e a ausencia de contacto cos grupos da oposición para buscar solucións conxuntas. “Un asunto desta importancia deberíase abordar con consenso e coas achegas de todas as forzas representadas na Corporación Municipal”, engadiu. Abelenda concluíu reclamando “transparencia, responsabilidade e respecto institucional” e asegurou que o PSOE manterase vixiante ante calquera intento de trasladar os custos da situación á veciñanza.