-O presidente da institución, o socialista Valentín González Formoso destaca que a iniciativa permite fixar poboación, apoiar ás pequenas empresas locais e crear novas oportunidades de emprego nos concellos máis pequenos
A Deputación da Coruña financia este ano a contratación de 311 persoas en pequenas empresas, microempresas e negocios de persoas autónomas da provincia a través da liña de axudas PEL-Pemes Creación. A resolución da convocatoria vén de publicarse no Boletín Oficial da Provincia (BOP), e suporá un investimento de preto de 3,5 millóns de euros destinado á creación de emprego nos concellos de menos de 20.000 habitantes.
O presidente da Deputación, o socialista Valentín González Formoso, destacou que este programa “é unha mostra clara do compromiso da Deputación coa dinamización económica e a xeración de emprego estable e de calidade nos concellos máis pequenos da provincia”. Engadiu tamén que “apostamos por un modelo de axudas que chegan directamente ás pemes e autónomos, que crean postos de traballo e manteñen vivo o tecido económico e social do rural coruñés”.
As axudas permitirán ás entidades beneficiarias cubrir ata o 70% dos custos laborais durante un período máximo de 12 meses, incluíndo soldos, cotizacións á Seguridade Social e outros gastos sociais. Os contratos subvencionables deberán ter unha duración mínima de seis meses, e o importe máximo da subvención por persoa contratada será de 15.000 euros no caso de contratos de xornada completa dun ano.
Santiago e Costa da Morte, as comarcas con máis axudas concedidas
Segundo os datos publicados, máis do 81% das empresas beneficiarias realizarán contratos indefinidos, e máis do 78% serán a xornada completa, o que confirma a orientación do programa cara á creación de emprego estable. A maior parte das concesións concéntranse nas comarcas de Santiago, con 97 axudas por un importe de 1.100.381,77 euros, e Bergantiños-Costa da Morte, con 69 concesións que suman 756.555,05 euros. Entre os concellos con maior número de solicitudes concedidas destacan Mazaricos (20), Ordes (14) e Cee (12).
Os municipios de entre 5.001 e 10.000 habitantes agrupan o 38,91% das concesións, mentres que os de entre 2.001 e 4.000 suman un 26,37%. Por perfil das entidades beneficiarias, as persoas autónomas son o colectivo máis numeroso, con 177 solicitudes concedidas, o que representa o 56,91% do total. Tamén destaca a presenza feminina, xa que 118 das empresas beneficiarias están lideradas por mulleres ou teñen maioría de capital social feminino, o que supón case o 38% do total.
“O noso obxectivo é que as oportunidades non dependan do lugar onde se viva, e que a creación de emprego e o apoio ao emprendemento sexan tamén unha realidade nas zonas con menor poboación”, afirmou Formoso. “Con programas como este contribuímos a fixar poboación, apoiar ás pequenas empresas locais e a crear novas oportunidades de emprego nos concellos máis pequenos da provincia”, concluíu o socialista.
Por sectores, o terciario é o máis favorecido (60,77%), especialmente en hostalaría e comercio, seguido do secundario (19,61%), centrado en construción e reformas, e o primario (18,01%). Ademais, case o 94% das empresas beneficiarias acceden por primeira vez a esta liña de axudas, o que reflicte a súa capacidade para chegar a novas iniciativas emprendedoras no rural.
Nos seus nove anos de historia, o PEL suma máis de 120 millóns de euros de investimento, demostrando ser un gran aliado para concellos, pemes e autónomos e ofrecendo diferentes liñas de axuda que responden ás necesidades específicas de cada colectivo. As cifras dan conta do éxito: 7.700 empregos creados no sector público e privado, 2.700 pequenas empresas beneficiadas das axudas para investimentos e modernización, 4.000 autónomos que viron reducida a súa cuota mensual e máis de 260 proxectos emprendedores xestados nos 11 centros cos que conta a Rede Provincial de Espazos de Coworking da Deputación.
RRSS
