O PSOE de Teo critica que a alcaldesa rexeite a reunión da Xunta de Portavoces: “Informa aos medios pero non á oposición” 

– Mayte Argibay afirma que Lucía Calvo “fai balance da súa xestión en medios de comunicación pero non atende ás peticións de xuntanza dende o pasado mes de xullo”.

– Sinala tamén que o goberno local incumpre o artigo 19.3 do regulamento municipal, que obriga a convocar un pleno extraordinario ao inicio de cada ano.

O PSdeG-PSOE de Teo critica que a alcaldesa Lucía Calvo rexeite a petición da oposición municipal de convocar unha Xunta de Portavoces para rendir contas da súa xestión. 

A voceira socialista local Mayte Argibay lamenta que “a alcaldesa informa aos medios pero non á oposición”, xa que na súa opinión “fai balance da súa xestión en medios de comunicación pero non atende ás peticións de xuntanza dende o pasado mes de xullo”. 

“Esta Xunta de Portavoces foi solicitada en dúas ocasións e rexeitada en ambas”, explica Argibay.  “Mentres, a maioria das novas que se producen no Concello de Teo coñecémolas antes pola prensa que polo equipo de goberno”, engade. 

Argibay subliña que “o oxectivo da reunión que solicitamos é precisamente valorar como se desenvolveu a lexislatura ata o de agora e intentar colaborar entre todos e todas na xestión municipal”. 

“Porén, facendo gala do seu caracter autoritario, xa habitual neste tipo de temas, e abusando da súa maioría absoluta, Calvo afirmou nas dúas ocasións que o pedimos que a reunión non era viable”, indica. 

“Tamen queremos denunciar que a rexedora incumpre reiteradamente o Regulamento Orgánico Municipal, que establece no seu Artigo 19.3 a obriga de convocar un pleno extraordinario ao inicio de cada ano para valorar a situación xeral do Concello”, afirma a socialista. 

“Queremos amosar claramente o noso descontento pola falta de comunicación e transparencia de Lucía Calvo e o goberno municipal, que amosa co resto de grupos políticos unha actitude que non ten nada que ver coa imaxe que ela quere ofrecer a través dos medios”, conclúe.