O PSOE de Teo critica a falta de avances na xestión municipal no ecuador do mandato

– Denuncian a paralización de proxectos clave como o polígono industrial, o centro de saúde da Ramallosa ou o contrato do lixo, e cuestionan o uso da comunicación institucional por parte da alcaldesa

O Grupo Municipal Socialista de Teo cuestiona o balance de xestión realizado pola alcaldesa Lucía Calvo, do Partido Popular, ao cumprirse dous anos do inicio do mandato.

Segundo a oposición socialista, varios dos compromisos adquiridos polo goberno local non experimentaron avances significativos, mentres que outros proxectos son considerados inadecuados ou carentes de planificación.

Entre os puntos sinalados polo PSdeG-PSOE de Teo figuran o estado actual do polígono industrial, que consideran estancado, e o do centro de saúde da Ramallosa, cuxo desenvolvemento afirman que continúa igual que cando foi asinado polo anterior goberno.

Tamén critican a elección do emprazamento para o futuro centro de día, ao que se refiren como “un galpón con condicións dubidosas e escasa aceptación veciñal”, en palabras da voceira socialista local Maite Argibay.

No ámbito sanitario, denuncian “a precariedade dos centros de saúde, cunha falta de pediatras e listas de agarda prolongadas”. Tamén “a situación da veciñanza de Pontevea, que segue sen poder utilizar o seu local sanitario despois de dous anos, tendo que desprazarse a módulos prefabricados en Cacheiras”.

Outro dos temas destacados é o contrato de recollida do lixo, que, segundo explica a voceira socialista, “continúa sen aprobarse malia ter sido unha das promesas destacadas do equipo de goberno popular”.

Respecto ás obras nas parroquias, sinala que a maioría foron iniciadas ou proxectadas por gobernos anteriores, e aseguran que “as melloras nos centros educativos, das que presume o actual executivo, levan anos sendo reclamadas pola comunidade escolar e por representantes da oposición”.

O grupo socialista tamén manifesta o seu desacordo co que consideran un uso excesivo da comunicación institucional. Argibay apunta que o goberno local “difunde reportaxes fotográficas por case todas as actividades e actuacións”, incluíndo actos simbólicos ou de pouca relevancia.

Finalmente, lembra que dous anos despois do inicio da lexislatura segue sen constituírse o Consello Escolar Municipal, un órgano de participación regulado por normativa local que, segundo indican, debería estar en funcionamento desde o comezo do mandato.