O PSdeG pide a dimisión do alcalde de Ferrol tras votar en contra do incremento do gasto militar

-O PSdeG acusa a Rey Varela de antepoñer os intereses do seu partido aos de Ferrol e reclama a súa dimisión tras votar en contra dun incremento do gasto en defensa clave para o futuro do naval

O Partido Socialista de Galicia reclamou onte a dimisión inmediata do alcalde de Ferrol, José Manuel Rey Varela, tras o seu voto en contra dunha moción que apoiaba o incremento do investimento estatal en materia de defensa ata o 2 % do PIB, medida impulsada polo Goberno de Pedro Sánchez. 

O portavoz municipal socialista, Ángel Mato, criticou duramente a postura do rexedor e acusouno de antepoñer os intereses do seu partido aos da cidade. Mato lembrou que a construción naval militar é un dos piares económicos da comarca de Ferrolterra e que grazas ao impulso do Goberno central se están a investir 4.500 millóns de euros na construción de cinco fragatas, xerando preto de 9.000 empregos.

“En 2017 as gradas do estaleiro estaban baleiras. Hoxe temos o maior programa de construción naval militar que houbo nunca nesta cidade. O voto do alcalde en contra da estabilidade dese investimento é absolutamente incomprensible”, afirmou Mato.

“Ningún alcalde de Ferrol debería pasar nin un minuto máis no cargo se non é capaz de defender os intereses da súa cidade fronte aos do seu partido”, engadiu.

Mato puxo como exemplo a coherencia do PP en Narón, onde os populares apoiaron a mesma moción, destacando que “entenderon a importancia estratéxica da defensa para a comarca”. Pola contra, censurou que en Ferrol o PP se posicionase, ao seu xuízo, “en contra da creación de emprego e da estabilidade industrial”.

O voceiro socialista tamén puxo en valor outros investimentos do Executivo central en Ferrol, como a modernización do estaleiro, as obras no porto interior ou a aposta polo ferrocarril. Anunciou ademais que manterá encontros co Ministerio de Defensa para reclamar o dique cuberto para Ferrol e nova carga de traballo.

“Ese papel tócalle desempeñalo ao alcalde. Eu fágoo porque teño un compromiso ineludible cos cidadáns, pero quen debería lideralo é o señor Rey Varela”, asegurou Mato. 

Pola súa banda, Bernardo Fernández, secretario provincial do PSdeG, cualificou a postura do alcalde de “cínica” e “contraditoria”, ao participar en

actos vinculados co sector naval e coas Forzas Armadas mentres vota en contra da súa consolidación orzamentaria.

“Ninguén se imaxina a Abel Caballero votando en contra dun aumento do investimento no sector da automoción en Vigo, ou a Inés Rey facendo o mesmo co sector téxtil na Coruña. Pois aquí, en Ferrol, o alcalde vota en contra dun sector fundamental para a economía da cidade”, sinalou.

Fernández lembrou que o 17 % do emprego da provincia da Coruña depende directamente da defensa e lamentou que tamén na Deputación se rexeitase a moción, con votos en contra do PP, incluída a concelleira ferrolá Susana Sanjurjo.

“Non se pode ir a manifestacións pedindo carga de traballo para o naval e logo votar en contra dunha medida que garante precisamente iso”, concluíu. Tanto Mato como Fernández coincidiron en que o voto negativo á moción supón “dar as costas aos traballadores, ás súas familias e á historia industrial de Ferrol”. Por iso, reiteraron a esixencia de que José Manuel Rey Varela abandone a Alcaldía.