O PSdeG denuncia o abandono do lavadoiro da Penisqueira apenas tres meses despois da súa inauguración

• Fran Suárez-Puerta denuncia que unha obra de case 50.000 euros, financiada con fondos europeos, xa presenta sinais evidentes de abandono

O PSdeG de Ribeira levará ao pleno municipal a situación do lavadoiro da Penisqueira, en Aguiño, tras comprobar o deterioro que presenta apenas tres meses despois da súa inauguración. A actuación, aberta ao público o pasado 25 de marzo, supuxo un investimento de 48.198,54 euros e foi presentada polo Goberno municipal como unha intervención destinada a recuperar un espazo de especial valor histórico, social e paisaxístico para a parroquia.

O portavoz socialista, Fran Suárez-Puerta, considera “incomprensible” que unha obra tan recente presente xa unha falta evidente de coidados. “Non estamos falando dun espazo abandonado desde hai anos, senón dunha actuación inaugurada hai apenas tres meses e financiada con diñeiro público”, advertiu. Segundo explicou, o problema non se limita á mala imaxe que ofrece actualmente o lavadoiro, xa que a ausencia dunha limpeza regular e dun mantemento continuado pode favorecer a degradación dos elementos rehabilitados, incrementar o risco de escorregamentos e provocar problemas de salubridade nunha zona frecuentada tanto pola veciñanza como polos visitantes.

Suárez-Puerta incidiu tamén na relevancia social do enclave e lembrou que o propio Goberno local o presentou como parte da memoria colectiva de Aguiño. “Durante décadas foi un lugar de encontro para numerosas xeracións de veciñas e non pode quedar reducido a unha fotografía máis da alcaldesa”, afirmou. O portavoz do PSdeG destacou, ademais, que o lavadoiro se atopa nunha contorna costeira de gran valor paisaxístico e nunha zona habitual de paseo. “Non é un elemento pensado unicamente para atraer visitantes. É patrimonio de Aguiño e un espazo utilizado pola xente de toda Ribeira, que merece atopalo en condicións dignas”, sinalou.

O PSdeG lembra que a actuación foi executada con fondos europeos, polo que considera imprescindible garantir a súa conservación, funcionalidade e permanencia no tempo. Para os socialistas, a responsabilidade municipal non remata coa finalización da obra nin coa súa presentación pública, senón que debe continuar cunha planificación estable de limpeza, revisión e reparación das deficiencias que poidan aparecer. Suárez-Puerta criticou que o Goberno municipal “anuncie investimentos e difunda imaxes, pero esqueza o que vén despois”, e subliñou que “un investimento público só ten sentido se se conserva e continúa sendo útil para a cidadanía; do contrario, é tirar os cartos de todos os veciños e veciñas”.

Por este motivo, o Grupo Municipal Socialista reclamará ao Goberno local unha actuación inmediata para limpar e acondicionar o lavadoiro, revisar o estado dos elementos rehabilitados e corrixir as deficiencias existentes. A formación solicitará tamén a creación dun plan de conservación posterior para todas as actuacións de recuperación do patrimonio que se están levando a cabo no municipio, co obxectivo de evitar que situacións coma esta volvan repetirse. “Pedimos unha solución e unha planificación seria que protexa os investimentos realizados e garanta que os espazos recuperados continúen cumprindo a súa función social, histórica e turística”, concluíu Fran Suárez-Puerta.