O PSdeG de Zas homenaxeará este sábado a Isabel Suárez Amado na Casa do Pobo ás 18:00

• O acto de lembranza e homenaxe á zaseira, moi coñecida no tecido asociativo do municipio, chega na semana na que se celebra o Día da Muller Rural 

O PSdeG-PSOE de Zas dedicará o Día da Muller Rural, celebrado o pasado día 15 de outubro, á zaseira Mª Isabel Suárez Amado, cunha homenaxe que terá lugar este sábado 18 de outubro. 

A Casa do Pobo, na Rúa Agra dos Cregos, acollerá ás 18:00 do sábado o acto e a entrega á familia dun recoñecemento a Suárez Amado, unha muller “que adicou a súa vida a mellorar a súa vila”, en palabras da voceira socialista local Sheila Rial. 

Estivo vinculada dende moi nova á vida asociativa na súa parroquia de San Cremenzo de Pazos, ocupando numerosos cargos nas comisión de festas e na Asociación de Veciños. Tamén á cultura, como parte da Escola Municipal de Teatro de Persoas Adultas de Zas, e á política, formando parte das listas electorais do PSOE de Zas dende 1995 durante varias lexislaturas consecutivas. 

O seu falecemento en outubro de 2018 causou unha fonda conmoción en todo o municipio, posto que era unha persoa moi coñecida e querida que se adicou plenamente a mellorar a vida no rural. 

“Queremos facerlle unha merecida homenaxe, dende o respecto e con todo o cariño, para recordala e agradecerlle todo o que loitou por mellorar a súa parroquia e o seu municipio, e faremos entrega dun merecido recoñecemento que será recollido por súa nai”, afirma Rial. 

“É unha honra poder facer este acto, co que queremos devolverlle un pouco de todo o que ela nos deu”, sinala a socialista. “Quero agradecerlle a súa nai, a señora Élida, o seu apoio para facelo e que poidamos entregarlle este recoñecemento a ela, vai ser algo moi emotivo e bonito”, engade.  O acto de homenaxe estará aberto, en palabras de Rial, “a todas as persoas que queiran acompañarnos, recordala e agradecerlle todo o que fixo”.