O PSdeG de Lousame celebra que a Deputación aprobe o convenio de cooperación co concello para a renovación do céspede do campo de fútbol

• Juan José Prego explica que a achega provincial de 163.824,91€ permitirá dar cumprimento a unha vella demanda das asociacións deportivas e a veciñanza

O PSdeG-PSOE de Lousame celebra a aprobación por parte do pleno da Deputación da Coruña do convenio de cooperación entre esta institución e o Concello de Lousame para a renovación do céspede artificial do campo de fútbol municipal de Cabanetán.

O voceiro socialista local Juan José Prego Ces sinala que a achega provincial de 163.824,91€ permite “solucionar unha situación de deterioro que se viña alongando no tempo, tal e como nos trasladaban as entidades deportivas do municipio e mais a veciñanza”.

“Aínda estando na oposición, conseguimos, a través das nosas xestións coa Deputación, conseguir este tipo de melloras para o conxunto da cidadanía de Lousame”, afirma Prego Ces.

Pola súa banda, o deputado provincial encargado da área de Deportes, o socialista Antonio Leira, considera positivo que “o Concello dese o paso adiante para solicitar esta actuación tan necesaria a raíz da moción presentada polo Grupo Socialista Local, aprobada no pleno municipal”.

“Foi unha petición que me chegou por iniciativa da Agrupación Socialista, e despois de reunirme coas entidades deportivas observei que a situación se viña prolongando demasiado tempo”, explica Leira.

O socialista quixo “felicitar á agrupación por ser quen de poñer en valor esta necesidade e levar adiante as medidas necesarias para que o Concello solicitase o convenio”.