O PSdeG de Coristanco critica a improvisación e o engano do goberno do PP

O PSdeG de Coristanco critica con dureza a forma de actuar do goberno municipal do Partido Popular, que vén de convocar un pleno extraordinario “con présa e sen planificación” unicamente para tapar un requirimento da Deputación da Coruña e incluír un proxecto “amañado e fóra de tempo” que non resolve os problemas reais da parroquia de Verdes.

Segundo explica o voceiro socialista, José Manuel Pérez Abelenda, o proxecto presentado polo alcalde implica expropiacións a veciños e non atende a principal demanda da zona: mellorar os accesos ao refuxio de Verdes.

“O que precisan os veciños é facilitarlles o día a día e que os visitantes poidan chegar ao refuxio en boas condicións, non obras de escaparate que non solucionan nada”, sinala Pérez Abelenda.

Os socialistas lembran que o proxecto está redactado desde setembro de 2024, pero o alcalde mantívoo agochado durante meses, sen actuar nin informar.

“Tiveron tempo dabondo para facer as cousas ben, pero agora, a última hora, sácano do caixón só para poder pedir diñeiro á Deputación. Iso non é gobernar, é enganar á veciñanza”, denuncia o voceiro socialista.

O PSdeG acusa o PP de gobernar a base de parches e improvisacións, de costas á cidadanía e sen proxecto de futuro. “O alcalde e o seu equipo non gobernan para a xente, senón para cubrir expediente e saír na foto. Unha vez máis demostran a súa incapacidade e a falta de compromiso coa parroquia de Verdes, algo que xa se ve na situación do refuxio”, conclúe Pérez Abelenda.