O PSdeG celebra o anuncio da nova potabilizadora de Frades, unha “demanda histórica” do partido

• O voceiro socialista local Enrique Astray e a deputada autonómica Silvia Longueira reclaman que o anuncio se materialice antes de rematar o ano

O PSdeG-PSOE celebra o anuncio onte por parte do consello da Xunta de Galicia dunha nova potabilizadora para o Concello de Frades.

“A Xunta de Galicia dá a razón a unha demanda histórica do PSOE de Frades, que ano tras ano reclamaba para o noso concello unha potabilizadora”, sinala o voceiro socialista local Enrique Astray.

“Quedamos á espera de que isto non sexa só un anuncio do PP de Rueda, que se materialice o servizo que vimos agardando dende hai anos e que esta sexa realmente unha solución efectiva”, engade.

Pola súa banda, Silvia Longueira, deputada socialista no Parlamento galego, sinalou que este anuncio se produce “grazas á insistencia do noso portavoz no Concello de Frades”.

“Por fin conseguímolo”, celebra a parlamentaria, que destaca as emendas que “ano tras ano” presentaba o Partido Socialista aos orzamentos da Xunta de Galicia con esta fin. Subliñou tamén que agarda que non se trate dun anuncio só “para quedar ben, senón que se teña materializado antes da fin do ano, porque os veciños de Frades veñen demandando desde hai anos este novo servizo”.