A Agrupación Socialista de Cabanas presenta este venres o libro ‘Mareas abertas’ sobre accesibilidade no turismo marítimo-pesqueiro en Galicia

• A portavoz socialista, Beatriz Carbón, participará no acto xunto ás autoras, Iria Caamaño Franco e Antonia Pérez García
• A presentación, con entrada libre ata completar aforo, terá lugar este venres 29 de maio, ás 19.00 horas, na Escola Laica de Cabanas

A Agrupación Socialista de Cabanas organiza este venres, 29 de maio, ás 19:00 na Escola Laica de Cabanas, a presentación do libro ‘Mareas abertas: rumbo á accesibilidade no turismo marítimo-pesqueiro en Galicia’, unha obra das investigadoras Iria Caamaño Franco e Antonia Pérez García, docentes da Facultade de Turismo da Universidade da Coruña.

No acto participará a portavoz socialista de Cabanas, Beatriz Carbón, xunto coas autoras do volume, que explicarán as principais conclusións dun traballo centrado na necesidade de facer do patrimonio marítimo-pesqueiro galego un espazo máis accesible, inclusivo e aberto a todas as persoas.

A obra nace no marco do proxecto ACD_MAR, Laboratorio Inclusivo do Patrimonio Marítimo-Pesqueiro, unha iniciativa impulsada por FUNDAMAR, AMICOS e a Facultade de Turismo da UDC co obxectivo de promover unha actividade turística marítimo-pesqueira accesible e inclusiva para persoas con diversidade funcional en Galicia.

Desde a Agrupación Socialista de Cabanas salientan que esta presentación “une investigación aplicada, compromiso social e posta en valor da identidade mariñeira de Galicia”. Neste sentido, destacan que o libro “é unha ferramenta útil para avanzar cara a un modelo turístico máis xusto, sustentable e atento ás necesidades reais das persoas”.

Mareas abertas recolle aprendizaxes e propostas xeradas a través dunha metodoloxía participativa e interdisciplinaria, baseada no diálogo entre estudantes, profesionais e persoas con diversidade funcional. O seu obxectivo é identificar barreiras, analizar deficiencias e propoñer solucións innovadoras para que o turismo vinculado ao mar sexa tamén unha oportunidade de inclusión e desenvolvemento local.

A presentación chega despois de que a obra fose recoñecida nos Premios CETT Alimara Barcelona, na categoría Through Research, que distingue traballos de investigación aplicada capaces de ofrecer respostas aos retos actuais do sector turístico. O acto está aberto a entidades sociais, asociacións, concellos, profesionais do turismo, colectivos vinculados á inclusión e á accesibilidade, e ao conxunto da veciñanza interesada. A entrada será libre ata completar aforo.