O PSdeG rende homenaxe en Ferrol ás vítimas da ditadura e reivindica a importancia de preservar a memoria democrática

Os socialistas participaron hoxe no acto organizado pola Asociación Cultural de Memoria Histórica Democrática en Canido e colaboraron cun ramo de rosas en lembranza de Xaime Quintanilla e María Vázquez Suárez

O PSdeG-PSOE participou este sábado no memorial ás vítimas da ditadura celebrado na praza Antón Varela, no barrio ferrolán de Canido, con motivo do Día de Lembranza e Homenaxe a todas as vítimas do golpe militar, a guerra e a ditadura. O acto, organizado pola Asociación Cultural de Memoria Histórica Democrática, reuniu representantes institucionais e participantes nunha xornada dedicada ao recordo e ao recoñecemento das persoas que sufriron a represión. 

En representación do PSdeG participaron Julián Reina, candidato número dous ao Congreso; Aitor Bouza, deputado autonómico; Rosa Ana García, deputada provincial responsable das áreas de Industria, Emprego, Política Demográfica e Medio Ambiente; e Ángel Mato, voceiro socialista en Ferrol, xunto con outros cargos públicos e orgánicos das comarcas do Eume, Ferrolterra e Ortegal. 

Durante o acto, o PSdeG colaborou cun ramo de rosas en lembranza de Xaime Quintanilla e María Vázquez Suárez, dúas persoas homenaxeadas este ano polo Estado e cuxas traxectorias forman parte da memoria histórica de Galicia. 

Coa súa participación nesta homenaxe, os socialistas quixeron contribuír ao recoñecemento das vítimas da represión e á preservación da memoria democrática, destacando a importancia de manter vivo o recordo das persoas que sufriron as consecuencias do golpe militar, da guerra e da ditadura. 

O acto de Canido serviu tamén como espazo de lembranza colectiva e de recoñecemento ao traballo desenvolvido polas entidades memorialistas para recuperar e divulgar a historia das vítimas, preservar o seu legado e transmitilo ás novas xeracións. 

Desde o PSdeG subliñan a importancia de seguir promovendo iniciativas de memoria democrática e de apoiar o labor das asociacións que traballan pola recuperación da verdade histórica, a xustiza e a reparación das vítimas. 

Os socialistas reiteran así o seu compromiso coa defensa dos valores democráticos e coa necesidade de preservar a memoria colectiva, para que as vítimas da represión non caian no esquecemento e para que as futuras xeracións coñezan esta parte da nosa historia.