O PSOE de Bergondo celebra que Patrimonio permita a eliminación do punto negro de Villa Julia “tras máis de 20 anos de espera”

• A vicesecretaria xeral do PSdeG Provincial e alcaldesa do municipio, Alejandra Pérez Máquez, espera que esta vez “se resolva o problema de xeito definitivo”
• 
  Pérez Máquez puxo en valor o traballo nesta dirección realizado polo PSOE tanto dende o Concello como dende o departamento de Vías e Obras da Deputación

O PSdeG-PSOE de Bergondo celebra a recente autorización por parte da Dirección Xeral de Patrimonio da Xunta de Galicia para executar o proxecto de ensanche da estrada DP-0810 en San Paio, na parroquia de Guísamo. Esta infraestrutura permitirá eliminar o punto negro de Villa Julia.

A alcaldesa socialista e vicesecretaria xeral do PSdeG Provincial, Alejandra Pérez Máquez, sinala que “o PSOE bergondés leva pelexando máis de dúas décadas” por eliminar dito punto negro e agarda que desta vez “se resolva o problema de xeito definitivo”.

A socialista amosa o seu desexo de que termine “esta carreira de fondo na que o Partido Socialista, tanto desde o Concello como desde a Deputación, que será a encargada de executar a obra, pois a vía é de titularidade provincial, estivo desde o principio”.

O presidente da Deputación da Coruña, Valentín González Formoso, R euniuse esta mañá coa veciñanza de San Paio xunto a Pérez Máquez para informalos da decisión. A rexedora celebra que “por fin, tras máis de 20 anos de espera, os veciños e veciñas de San Paio vexan solucionados os problemas de tráfico que se xeran nesta vía”.

Concluíu afirmando que “non pode ser que a xustiza estivese a avalar os intereses dunha soa persoa por enriba do ben común e a seguridade dos veciños e veciñas que circulan por unha estrada cun alto volume de tráfico, houbo mesmo ameazas moi serias por parte do propietario da leira a técnicos da Deputación”.